మహిళలకు భారీ గుడ్ న్యూస్.. ఉచితంగా ప్లాట్లు ఇవ్వనున్న ప్రభుత్వం
సీఎం రేవంత్ రెడ్డి ఎంఎస్‌ఎంఈ పాలసీ-2024ని ఆవిష్కరించారు:
తెలంగాణ రాష్ట్రంలో చిన్న, మధ్య తరహా పరిశ్రమలను ప్రోత్సహించడానికి సీఎం రేవంత్ రెడ్డి నూతన ఎంఎస్‌ఎంఈ (MSME) పాలసీ-2024ను ఆవిష్కరించారు. ఈ కార్యక్రమంలో డిప్యూటీ సీఎం భట్టి విక్రమార్క, మంత్రి శ్రీధర్ బాబు కూడా పాల్గొన్నారు. తెలంగాణ వ్యాప్తంగా వ్యాపారాలు మరియు పెట్టుబడుల విస్తరణ కోసం కొత్త పారిశ్రామిక విధానాన్ని ప్రకటించిన రేవంత్ రెడ్డి, ఈ కొత్త పాలసీ రాష్ట్రానికి ప్రపంచ దేశాలతో పోటీగా పారిశ్రామిక ప్రగతిని సాధించడానికి సహాయపడుతుందని అన్నారు.
ఈ కొత్త ఎంఎస్‌ఎంఈ పాలసీ-2024ను మాదాపూర్ శిల్పకళా వేదికలో బుధవారం సీఎం అధికారికంగా విడుదల చేశారు. వ్యాపారాల అభివృద్ధి కోసం, పెట్టుబడుల వృద్ధి కోసం కొత్త పారిశ్రామిక విధానాన్ని తీసుకురాబోతున్నట్టు సీఎం రేవంత్ రెడ్డి ఇప్పటికే పలు సందర్భాల్లో వెల్లడించారు. తెలంగాణ రాష్ట్రంలో పరిశ్రమల అభివృద్ధికి విస్తృతమైన అవకాశాలు ఉన్నాయని ఆయన వివరించారు.
ప్రభుత్వం ఎంఎస్ఎంఈలు ఎదుర్కొంటున్న ఆరు ప్రధాన సమస్యలను గుర్తించింది. వీటిలో భూమి లభ్యత, మూలధన సౌకర్యాలు, ముడి పదార్థాల కొరత, శ్రామిక శక్తి కొరత, సాంకేతిక పరిజ్ఞానం అందుబాటులో లేకపోవడం, మరియు మార్కెట్‌లతో అనుసంధానం లేకపోవడం వంటి సవాళ్లను పరిష్కరించడానికి ప్రభుత్వం 40 ప్రతిపాదనలు చేసింది.
మహిళలు, ఎస్సీ, ఎస్టీలకు ప్రత్యేకంగా ప్లాట్లు రిజర్వు:
ప్రభుత్వం ప్రతీ పారిశ్రామిక పార్కులో 20 శాతం ప్లాట్లు ఎంఎస్‌ఎంఈల కోసం రిజర్వు చేయనున్నట్లు సీఎం రేవంత్ రెడ్డి ప్రకటించారు. రాబోయే 5 సంవత్సరాల్లో ప్రతి జిల్లాలో ఒక పారిశ్రామిక పార్కును ఏర్పాటు చేయనున్నట్లు, అలాగే ఓఆర్ఆర్ (ORR), ఆర్ఆర్ఆర్ (RRR) మధ్య 10 పారిశ్రామిక పార్కులను నిర్మించనున్నట్లు పాలసీ వివరించింది. ఈ పార్కుల్లో 5 ఎంఎస్‌ఎంఈ పార్కులు ఉండగా, వాటిలో 5 శాతం ప్లాట్లు మహిళా పారిశ్రామికవేత్తలకు, 15 శాతం ప్లాట్లు ఎస్సీ, ఎస్టీ పారిశ్రామికవేత్తలకు రిజర్వ్ చేయనున్నట్లు తెలిపారు. ఎంఎస్‌ఎంఈల సమర్థవంతమైన అమలు, పర్యవేక్షణ కోసం ఉన్నత స్థాయి స్టీరింగ్ కమిటీని ఏర్పాటు చేయనున్నట్లు సీఎం వివరించారు.